Eth Musèu de Maricel mòstre un itinerari artistic complèt dempús deth sègle X enquiath realisme e era figuracion dera prumèra mitat deth sègle XX, a trauès des colleccions d’art deth Dr. Jesús Pérez-Rosales e dera Vila de Sitges, damb òbres de grana qualitat. Era presentacion museugrafica intègre diuèrsi lenguatges, tecniques e supòrts artistics damb era finalitat d’arténher era maxima coeréncia ena seqüéncia cronologica dera evolucion des arts.

Era visita ath Musèu de Maricel s’inície en estatge dusau der edifici, damb es escultures e es retaules apertienti as periòdes romanics e gotics.

Era planta baisha deth Musèu de Maricel includís quate encastres clarament diferenciadi. Ena anciana capèla gotica der Espitau de Sant Joan e ena estança contigua, i a ua mòstra que prefigure eth contengut dera colleccion deth musèu. Amassa damb era capèla, eth guardader constituís era sala mès espectaculara, damb vistes sus era mar.