En 1910 Catalonha ei asfixiada peth naut prètz deth carbon d’importacion e era indústria catalana non pòt créisher, dat qu’a de besonh ua energia alternativa mès barata. Era fòrça dera aigua entà hèr electricitat ei era energia alternativa ath carbon. Emili Riu, un politic e empresari neishut en Sòrt en 1871, amassa damb eth Dr. Pearson, vederen rapidament eth potenciau deth Pirenèu entà generar energia electrica.
A arraïc d’aguesta naua possibilitat tecnica, Emili Riu se met a trabalhar tà arténher es concessions de drets des corsi d’aigua dera zòna. Tot seguit, se lance ara aventura de cercar finançament tà bastir ua centrau idroelectrica. Er an 1911 Riu cree era empresa Energía Eléctrica de Cataluña (EEC) e comencen es òbres d’ua centrau que se construís en un temps record de 23 mesi.
Capdella ei eth centre de produccion dera empresa EEC. Des deth burèu deth cap de seccion, maxim encargat des centraus, se supervise tota era òbra e es posteriores que se haràn ena val.
Emili Riu morís en Madrid en 1928, en mès absolut anonimat, e segurament sense èster conscient deth gran impacte qu’era sua òbra a agut en tot eth país.