Aguestes pèces provien dera generosa donacion que Philippe e Dorothée Selz heren ath musèu dera colleccion qu’es sòns pairs, Françoise e Guy Selz, amassèren pendent cinquanta ans (1925-1976), e qu’eri madeishi anèren completant: papèrs frisadi, crotzes, ex-vòts, pipes, animaus, masques, soldats de plomb, imatges populares, quadres de cròmos, etc. Se complie atau era maxima qu’exprimic eth que siguec conservador en cap deth Musèu des Arts Decoratives de París, François Mathey: «Quitament era colleccion mès secrèta acabe, fataument, mès tard o mès d’ora, laguens d’un musèu. Ei bon qu’eth musèu s’enriquisque, ath sòn torn, damb tot aquerò qu’auie mesestimat o ignorat».
De joen, Guy Selz s’interessèc pera creativitat e er art popular. Açò lo portèc a colleccionar objèctes insolits, estonants o pivelants, sense ierarquies ne frontères entre es genres e es arts.
Aguest esperit se rebatie tanben quan convidaue es amics tà casa. Tant en Eivissa, a on regentèc un bar entre eth 1933 e eth 1936, coma en París, a on siguec critic culturau d’Elle, revista dera quau tanben siguec secretari generau, establic autentiques amistats entre era gent dera cultura: Jacques Prévert, Walter Benjamin, Gisèle Freund, André Breton, Ionescu, Rafael Alberti, Jean-Paul Sartre, Agnès Varda, Juliette Greco, Alexander Calder, Foujita e es artistes catalans en París Rabascall, Xifra, Miralda, Benet Rossell, etc.