Era codina minjador ei er espaci mès gran dera planta baisha, per çò que anticament, enes cases umiles, es foncions de codinar e minjar auien lòc en ua unica estança. Soent, ath torn deth larèr, Rusiñol liegie as sòns amics sitgetans fragments des òbres literàries qu’escriuie. Tanben ei ací a on se celebrauen es repassi mès intimi, pendent es quaus er artista explicaue as sòns convidadi es hèts devengudi en sòn darrèr viatge en París, Granada o quinsevolh aute endret.
Actuaument es parets e estatgères dera codina minjador son plenes de fòrça pèces ceramiques que Rusiñol aqueric ath long dera sua vida: pòts de farmacia, lauamans, plats e escudèles. I predominen es objèctes de manufactura catalana, mès tanben n’i a fòrça que procedissen des principaus nuclèus de produccion dera Peninsula: Manises, Paterna, Muel, Teròl e Talavera de la Reina.
Eth cauhader que i a a man dreta, tanlèu que s’entre ena estança, s’enquadre laguens deth humarau construït damb ua hièstra provienta deth castèth de Sitges. Ara dreta deth cauhader, se ve un lindau de hièstra o pòrta que tanben proven der ancian castèth sitgetan.